Lauds

Office II (Advent), 1909 Dominican calendar

Prayers Before the Office

Aperi Dómine, os meum ad benedicéndum nomen sanctum tuum: munda quoque cor meum ab ómnibus vanis, pervérsis et aliénis cogitatiónibus; intelléctum illúmina, afféctum inflámma, ut digne, atténte ac devóte hoc Offícium recitáre váleam, et exaudíri mérear ante conspéctum divínæ Majestátis túæ. Per Christum Dóminum nostrum.

℟ Amen.

Dómine, in unióne illíus divínæ intentiónis, qua ipse in terris laudes Deo persolvísti, has tibi Horas (vel hanc tibi Horam) persólvo.

Introduction

℣ Deus ✠ in adjutórium meum inténde.

℟ Dómine, ad adjuvándum me festína.

℣ Glória Patri, et Fílio, * et Spirítui Sancto.

℟ Sicut erat in princípio, et nunc, et semper, * et in sǽcula sæculórum. Amen. (Outside Lent:) Allelúia. (from Septuagesima to Holy Saturday:) Laus tibi, Dómine, Rex ætérnæ glóriæ.

Psalms

Psalm 92

• Dóminus regnávit, decórem indútus est: * indútus est Dóminus fortitúdinem, et præcínxit se.
• Étenim firmávit orbem terræ, * qui non commovébitur.
• Paráta sedes tua ex tunc: * a sǽculo tu es.
• Elevavérunt flúmina, Dómine: * elevavérunt flúmina vocem suam.
• Elevavérunt flúmina fluctus suos, * a vócibus aquárum multárum.
• Mirábiles elatiónes maris: * mirábilis in altis Dóminus.
• Testimónia tua credibília facta sunt nimis: * domum tuam decet sanctitúdo, Dómine, in longitúdinem diérum.
• Glória Patri, et Fílio, * et Spirítui Sancto.
• Sicut erat in princípio, et nunc, et semper, * et in sǽcula sæculórum. Amen.

Psalm 99

• Jubiláte Deo, omnis terra: * servíte Dómino in lætítia.
• Introíte in conspéctu ejus, * in exsultatióne.
• Scitóte quóniam Dóminus ipse est Deus: * ipse fecit nos, et non ipsi nos.
• Pópulus ejus, et oves páscuæ ejus: * introíte portas ejus in confessióne, átria ejus in hymnis: confitémini illi.
• Laudáte nomen ejus: quóniam suávis est Dóminus, in ætérnum misericórdia ejus, * et usque in generatiónem et generatiónem véritas ejus.
• Glória Patri, et Fílio, * et Spirítui Sancto.
• Sicut erat in princípio, et nunc, et semper, * et in sǽcula sæculórum. Amen.

Psalm 62

• Deus, Deus meus, * ad te de luce vígilo.
• Sitívit in te ánima mea, * quam multiplíciter tibi caro mea.
• In terra desérta, et ínvia, et inaquósa: * sic in sancto appárui tibi, ut vidérem virtútem tuam, et glóriam tuam.
• Quóniam mélior est misericórdia tua super vitas: * lábia mea laudábunt te.
• Sic benedícam te in vita mea: * et in nómine tuo levábo manus meas.
• Sicut ádipe et pinguédine repleátur ánima mea: * et lábiis exsultatiónis laudábit os meum.
• Si memor fui tui super stratum meum, in matutínis meditábor in te: * quia fuísti adjútor meus.
• Et in velaménto alárum tuárum exsultábo, adhǽsit ánima mea post te: * me suscépit déxtera tua.
• Ipsi vero in vanum quæsiérunt ánimam meam, introíbunt in inferióra terræ: * tradéntur in manus gládii, partes vúlpium erunt.

Psalm 66

• Deus misereátur nostri, et benedícat nobis: * illúminet vultum suum super nos, et misereátur nostri.
• Ut cognoscámus in terra viam tuam, * in ómnibus géntibus salutáre tuum.
• Confiteántur tibi pópuli, Deus: * confiteántur tibi pópuli omnes.
• Læténtur et exsúltent gentes: * quóniam júdicas pópulos in æquitáte, et gentes in terra dírigis.
• Confiteántur tibi pópuli, Deus, confiteántur tibi pópuli omnes: * terra dedit fructum suum.
• Benedícat nos Deus, Deus noster, benedícat nos Deus: * et métuant eum omnes fines terræ.
• Glória Patri, et Fílio, * et Spirítui Sancto.
• Sicut erat in princípio, et nunc, et semper, * et in sǽcula sæculórum. Amen.

Canticle of the Three Children

Daniel III

• Benedícite, ómnia ópera Dómini, Dómino: * laudáte et superexaltáte eum in sǽcula.
• Benedícite, Ángeli Dómini, Dómino: * benedícite, cæli, Dómino.
• Benedícite, aquæ omnes, quæ super cælos sunt, Dómino: * benedícite, omnes virtútes Dómini, Dómino.
• Benedícite, sol et luna, Dómino: * benedícite, stellæ cæli, Dómino.
• Benedícite, omnis imber et ros, Dómino: * benedícite, omnes spíritus Dei, Dómino.
• Benedícite, ignis et æstus, Dómino: * benedícite, frigus et æstus, Dómino.
• Benedícite, rores et pruína, Dómino: * benedícite, gelu et frigus, Dómino.
• Benedícite, glácies et nives, Dómino: * benedícite, noctes et dies, Dómino.
• Benedícite, lux et ténebræ, Dómino: * benedícite, fúlgura et nubes, Dómino.
• Benedícat terra Dóminum: * laudet et superexáltet eum in sǽcula.
• Benedícite, montes et colles, Dómino: * benedícite, univérsa germinántia in terra, Dómino.
• Benedícite, fontes, Dómino: * benedícite, mária et flúmina, Dómino.
• Benedícite, cete, et ómnia, quæ movéntur in aquis, Dómino: * benedícite, omnes vólucres cæli, Dómino.
• Benedícite, omnes béstiæ et pécora, Dómino: * benedícite, fílii hóminum, Dómino.
• Benedícat Israël Dóminum: * laudet et superexáltet eum in sǽcula.
• Benedícite, sacerdótes Dómini, Dómino: * benedícite, servi Dómini, Dómino.
• Benedícite, Ananía, Azaría, Mísaël, Dómino: * laudáte et superexaltáte eum in sǽcula.
• Benedicámus Patrem et Fílium cum Sancto Spíritu: * laudémus et superexaltémus eum in sǽcula.
• Benedíctus es, Dómine, in firmaménto cæli: * et laudábilis, et gloriósus, et superexaltátus in sǽcula.

Psalm 148

• Laudáte Dóminum de cælis: * laudáte eum in excélsis.
• Laudáte eum, omnes Ángeli ejus: * laudáte eum, omnes virtútes ejus.
• Laudáte eum, sol et luna: * laudáte eum, omnes stellæ et lumen.
• Laudáte eum, cæli cælórum: * et aquæ omnes, quæ super cælos sunt, laudent nomen Dómini.
• Quia ipse dixit, et facta sunt: * ipse mandávit, et creáta sunt.
• Státuit ea in ætérnum, et in sǽculum sǽculi: * præcéptum pósuit, et non præteríbit.
• Laudáte Dóminum de terra, * dracónes, et omnes abýssi.
• Ignis, grando, nix, glácies, spíritus procellárum: * quæ fáciunt verbum ejus:
• Montes, et omnes colles: * ligna fructífera, et omnes cedri.
• Béstiæ, et univérsa pécora: * serpéntes, et vólucres pennátæ:
• Reges terræ, et omnes pópuli: * príncipes, et omnes júdices terræ.
• Júvenes, et vírgines: senes cum junióribus laudent nomen Dómini: * quia exaltátum est nomen ejus solíus.
• Conféssio ejus super cælum et terram: * et exaltávit cornu pópuli sui.
• Hymnus ómnibus sanctis ejus: * fíliis Israël, pópulo appropinquánti sibi.

Psalm 149

• Cantáte Dómino cánticum novum: * laus ejus in ecclésia sanctórum.
• Lætétur Israël in eo, qui fecit eum: * et fílii Sion exsúltent in rege suo.
• Laudent nomen ejus in choro: * in týmpano, et psaltério psallant ei:
• Quia beneplácitum est Dómino in pópulo suo: * et exaltábit mansuétos in salútem.
• Exsultábunt sancti in glória: * lætabúntur in cubílibus suis.
• Exaltatiónes Dei in gútture eórum: * et gládii ancípites in mánibus eórum.
• Ad faciéndam vindíctam in natiónibus: * increpatiónes in pópulis.
• Ad alligándos reges eórum in compédibus: * et nóbiles eórum in mánicis férreis.
• Ut fáciant in eis judícium conscríptum: * glória hæc est ómnibus sanctis ejus.

Psalm 150

• Laudáte Dóminum in sanctis ejus: * laudáte eum in firmaménto virtútis ejus.
• Laudáte eum in virtútibus ejus: * laudáte eum secúndum multitúdinem magnitúdinis ejus.
• Laudáte eum in sono tubæ: * laudáte eum in psaltério, et cíthara.
• Laudáte eum in týmpano, et choro: * laudáte eum in chordis, et órgano.
• Laudáte eum in cýmbalis benesonántibus: laudáte eum in cýmbalis jubilatiónis: * omnis spíritus laudet Dóminum.
• Glória Patri, et Fílio, * et Spirítui Sancto.
• Sicut erat in princípio, et nunc, et semper, * et in sǽcula sæculórum. Amen.

Capitulum

Eccli. 24

Ego quasi vitis fructificávi suavitátem odóris: et flores mei fructus honóris et honestátis.

℟ Deo grátias.

Hymn

O gloriósa Dómina,
Excélsa super sídera,
Qui te creávit, próvide
Lactásti sacro úbere.

Quod Heva tristis ábstulit,
Tu reddis almo gérmine:
Intrent ut astra flébiles,
Cæli reclúdis cárdines.

Tu Regis alti jánua
Et porta lucis fúlgida:
Vitam datam per Vírginem,
Gentes redémptæ, pláudite.

María, mater grátiæ,
Mater misericórdiæ,
Tu nos ab hoste prótege,
Et hora mortis súscipe.

Glória tibi Dómine,
Qui natus es de Vírgine,
Cum Patre et almo Spíritu,
In sempitérna sǽcula.

Amen.

℣ Elégit eam Deus et præelégit eam.

℟ Et habitáre eam facit in tabernáculo suo.

Canticum Zachariæ

Lucæ 1

• Benedíctus ✠ Dóminus, Deus Israël: * quia visitávit, et fecit redemptiónem plebis suæ:
• Et eréxit cornu salútis nobis: * in domo David, púeri sui.
• Sicut locútus est per os sanctórum, * qui a sǽculo sunt, prophetárum ejus:
• Salútem ex inimícis nostris, * et de manu ómnium, qui odérunt nos.
• Ad faciéndam misericórdiam cum pátribus nostris: * et memorári testaménti sui sancti.
• Jusjurándum, quod jurávit ad Ábraham patrem nostrum, * datúrum se nobis:
• Ut sine timóre, de manu inimicórum nostrórum liberáti, * serviámus illi.
• In sanctitáte, et justítia coram ipso, * ómnibus diébus nostris.
• Et tu, puer, Prophéta Altíssimi vocáberis: * præíbis enim ante fáciem Dómini, paráre vias ejus:
• Ad dandam sciéntiam salútis plebi ejus: * in remissiónem peccatórum eórum:
• Per víscera misericórdiæ Dei nostri: * in quibus visitávit nos, óriens ex alto:
• Illumináre his, qui in ténebris, et in umbra mortis sedent: * ad dirigéndos pedes nostros in viam pacis.
• Glória Patri, et Fílio, et Spirítui Sancto.
• Sicut erat in princípio, et nunc, et semper, et in sǽcula sæculórum. Amen.

Collect

℣ Dómine, exáudi oratiónem meam.

℟ Et clamor meus ad te véniat.

Ad Memoriam S. P. Dominici

℣ Lex Dei eius in corde ipsíus.

℟ Et non supplantabúntur gressus eius.

Ad Memoriam Sanctorum Ordinis Prædicatórum

℣ Exsultábunt Sancti in gloria.

℟ Lætabúntur in cubílibus suis.

Ad Memoriam Omnium Sanctorum

℣ Oráte pro nobis omnes Sancti Dei.

℟ Ut digni efficiámur promissiónibus Christi.

Ad Memoriam de Pace

℣ Fiat pax in virtúte tua.

℟ Et abundántia in túrribus tuis.

Conclusion

℣ Dómine, exáudi oratiónem meam.

℟ Et clamor meus ad te véniat.

℣ Benedicámus Dómino.

℟ Deo grátias.

℣ Ave María, grátia plena, Dóminus tecum.

℟ Benedícta tu in muliéribus, et benedíctus fructus ventris tui, Jesus.

Prayers After the Office

Sacrosánctæ et indivíduæ Trinitáti, crucifíxi Dómini nostri Jesu Christi humanitáti, beatíssimæ et gloriosíssimæ sempérque Vírginis Maríæ fœcúndæ integritáti, et ómnium Sanctórum universitáti sit sempitérna laus, honor, virtus et glória ab omni creatúra, nobísque remíssio ómnium peccatórum, per infiníta sǽcula sæculórum.

℟ Amen.

℣ Beáta víscera Maríæ Vírginis, quæ portavérunt ætérni Pátris Fílium.

℟ Et beáta úbera, quæ lactavérunt Christum Dóminum.

Pater noster, qui es in cælis, sanctificétur nomen tuum: advéniat regnum tuum: fiat volúntas tua, sicut in cælo et in terra. Panem nostrum quotidiánum da nobis hódie: et dimítte nobis débita nostra, sicut et nos dimíttimus debitóribus nostris: et ne nos indúcas in tentatiónem: sed líbera nos a malo. Amen.

Ave María, grátia plena; Dóminus tecum: benedícta tu in muliéribus, et benedíctus fructus ventris tui Jesus. Sancta María, Mater Dei, ora pro nobis peccatóribus, nunc et in hora mortis nostræ. Amen.